‘Wees ‘n Lig’ – Yolandie Versprei ‘n Boodskap van Liefde en Hoop met Kersenkelsnit

Share This Article:

‘Wees ‘n Lig’ – Ná 23 jaar van stilte het Yolandie haar stem teruggevind. Nou herinner sy luisteraars met haar oorspronklike Afrikaanse Kerslied daaraan dat ons elke dag ’n lig in iemand anders se lewe kan wees.

Lees ook: CheraLee Laat Dansvloere Gons Met Haar Meesleurende Nuwe Enkelsnit:“Ons Dansvloer”

‘Wees ‘n Lig’ – Yolandie se Kersboodskap

Kersfees is soveel meer as geskenke, blink liggies en feestelike voorbereidings. Dit is ’n tyd van liefde, omgee, dankbaarheid en die besondere betekenis van Christus se geboorte. Dit is juis hierdie boodskap wat die Afrikaanse sangeres en liedjieskrywer Yolandie met haar enkelsnit Wees ’n Lig wil oordra.

Die oorspronklike Afrikaanse Kerslied, wat op 24 Oktober 2025 vrygestel is, word weer vir die 2026-Kersseisoen onder die aandag van luisteraars gebring. Met sy sagte, lig-klassieke aanslag en kontemporêre Christelike klank is Wees ’n Lig ’n besonderse Kersballade wat luisteraars uitnooi om stil te staan by dit wat werklik saak maak.

Nie Noodwendig Geld Nie

Yolandie het self-die musiek en lirieke geskryf en die lied in samewerking met Johan Kelber Produksies vervaardig. “Ons raak so maklik vasgevang in die gejaag van die feestyd, die geskenke en al die voorbereidings dat ons soms vergeet dat die mooiste geskenk nie noodwendig iets is wat geld kos nie,” vertel Yolandie. “Soms is dit ’n bord kos wat jy deel, ’n eensame persoon wat jy besoek, ’n ou hand wat jy vashou of bloot ’n bietjie van jou tyd en liefde.”

Vir haar is die boodskap van die lied veel groter as net Kersfees. Dit is ’n lewenswyse wat ons elke dag behoort uit te leef deur Christus se liefde in ons optrede teenoor ander sigbaar te maak. “Ek glo ons kan elke dag vir iemand anders ’n klein bietjie Kersfees wees.”

Die lied se boodskap is besonder gepas vir ’n kunstenaar wie se eie lewensverhaal getuig van nuwe beginne, deursettingsvermoë en die moed om weer jou drome na te jaag.

Musiekdrome Herleef

Musiek was van kleins af deel van Yolandie se lewe. Haar liefde daarvoor het tussen familie, geloof en musiek begin. Haar Sondagskoolonderwyseres het vroeg reeds haar sangtalent raakgesien en haar aangemoedig om solo te sing. Haar pa het haar leer kitaar speel, terwyl haar ma haar gehelp het om mooi na die note en melodieë te luister. Saterdagaande het die familie om die kampvuur saamgesing, met Yolandie op die kitaar, en Sondae het musiek voortgeleef in die kerkkoor.

Haar professionele musiekreis het reeds in 1994 begin toe sy saam met André Schwartz deur die land getoer het. Sy het ook gereeld saam met Phillip Moolman opgetree. Maar toe ’n lang tydperk van stilte volg, het sy vir 23 jaar haar musiekdrome op die agtergrond geskuif.

“Ek het selfs skaam geword vir myself en my eie stem,” erken sy.

Yolandie se Wedergeboorte As Kunstenaar

Dit was uiteindelik Morné se Lied wat haar in 2024 teruggebring het na die musiekwêreld. Vir Yolandie was dit veel meer as net nog ’n liedjie; dit was haar wedergeboorte as kunstenaar en die begin van ’n nuwe hoofstuk waarin sy weer haar stem en kreatiwiteit kon ontdek.

Sedertdien het daar heelwat besondere hoogtepunte gevolg. Morné se Lied het op verskeie radiotrefferparades verskyn en vir ’n paar opeenvolgende weke die nommer-een-posisie beklee. In 2025 het Alles oor Jou die Melomaan-toekenning vir Musiekvideo van die Jaar ontvang, terwyl Caravans (Remix) met die toekenning vir Cover Song van die Jaar bekroon is. In 2026 het Engel aan my sy ook ’n Melomaan-toekenning ontvang.

Nog ’n besondere mylpaal is dat Wees ’n Lig deur Music Now SA vir hul Afrikaanse speellys goedgekeur is. Die platform verskaf onder meer agtergrondmusiek aan groot winkelsentrums, kettingwinkels en lughawens, wat die lied die geleentheid bied om ’n wyer gehoor te bereik.

Buiten haar musiek is Yolandie ook ’n radio-omroeper by Vaal Stereo, waar sy haar eie program, Stêrre, Wonderwerke & Giggels, elke Maandagaand tussen 20:00 en 22:00 aanbied. Die program bied haar die geleentheid om met kunstenaars, skrywers en interessante mense te gesels en hul stories met luisteraars te deel.

Sy het ook ’n besondere liefde vir die ouer garde van Afrikaanse musiek en country. Kunstenaars wat met karakter, waardigheid en talent diep spore getrap het, inspireer haar. Laurika Rauch se musiek beskryf sy as “sielskos”, omdat haar liedjies iets besonders in ’n mens se binneste wakker maak.

Interessant genoeg sou Yolandie, indien sy ooit ’n ander beroepsrigting moes kies, sielkunde oorweeg. 

Die Lewe Haar Inspirasie

Haar belangstelling in mense, hul emosies, ervarings en lewensverhale is immers ook ’n groot bron van inspirasie vir haar musiek.

Op 14 November bied sy die Onthou jy nog… Virginia Lee Huldeblyk – ENCORE aan, ’n produksie wat haar besonder na aan die hart lê. Daarna wag verskeie Kerssangoptredes. Sy werk ook reeds aan ’n nuwe lied saam met ’n bekende liedjieskrywer en sanger, wat vroeg in 2027 bekendgestel behoort te word. Daar is selfs sprake van ’n moontlike dokumentêr oor haar verhaal.

Wanneer Yolandie oor haar musiek praat, is dit duidelik dat haar doel veel verder strek as bloot om liedjies op te neem en uit te voer. Sy wil met haar stem vreugde bring, hoop gee en soms net vir iemand ’n mooi oomblik skep.

Ek wil mense se harte aanraak, soos musiek my eie hart aanraak.

– Yolandie –

Ten Slotte

Met Wees ’n Lig lewer Yolandie ’n eenvoudige, maar betekenisvolle uitnodiging aan elke luisteraar: om verby die oppervlakkige dinge van die feestyd te kyk en die geleentheid aan te gryp om iemand anders se lewe ‘n bietjie mooier te maak. Want soms is die grootste geskenk wat jy iemand kan gee, nie iets wat jy kan toedraai nie, maar iets wat jy uit jou hart gee.

Wees vandag die lig wat iemand anders dalk so dringend nodig het.

Bronne

https://www.citizen.co.za/vaalweekblad/news/news-news/2025/12/16/yolandie-bring-hoop-en-warmte-met-nuwe-kerslied-wees-n-lig/

Embrace The Brand Media

Tags :

Annette Havenga

womeninmedia@happeningnews.co.za

Journalist Writer Radio Presenter

Leave a Reply

Your email address will not be published. Required fields are marked *

Stay Informed

Subscribe for breaking news, trusted South African reporting, exclusive interviews and our weekly news roundup.

No spam. Unsubscribe anytime.

    Categories

    About HappeningNews

    HappeningNews is an independent South African digital news platform delivering breaking news, insightful features, lifestyle stories, and inspiring voices.

    Home to Women in Media and our exclusive editorial columns, we keep readers informed with accurate and engaging content from South Africa and around the world.

    © 2026 HappeningNews. All Rights Reserved.

    Independent South African Digital News Platform